مرت الايام التالية تقليدية بالنسبة لفهد وبدون اي احداث مختلفة ولكن على الجانب الاخر كانت حياة لوجين مليئة بالحركة والعمل لان ذلك الوقت من مواسم تلك المدينة و خصوصا الراغبين في تعلم رياضة الغطس وذلك يعني الكثير من العمل لدرجة انها نسيت اللقاء السابق.
يوم الخميس خرج فهد من منزله متانقاً ومعه حقيبة رياضية صغيرة وضعها في سيارته الواقفة امام المنزل. كانت سيارة سوداء ذات بابين من نوع BMW تم انتاجها في تسعينات القرن الماضي ولكن يبدو عليها انه تم تجديدها قريباً لتصبح ذات طابع رياضي عنيف اكثر.
ركب فهد السيارة و انطلق بها متجها الى العنوان الموجود في الكارت الخاص بمركز لوجين وكان العنوان يبعد عن منزله قرابه الساعه الا ربع الساعه. اشعل فهد سيجارته وهو يختار الاغاني التي سترافقه رحلته ثم انشغل بالقيادة وتامل المناظر الطبيعية والجبال مما جعل الوقت يمر سريعا و سرعان ما وجد نفسه على اول الطريق المؤدي للمركز الذي كان يجب الوصول اليه مشياً على الاقدام. قام فهد بترك سيارته و التقط حقيبته وذهب تجاه المركز الى ان وصل العنوان المكتوب بالضبط.
دفع فهد الباب ودخل بخطى واثقة ثم وقف امام المكتب الموضوع في مدخل المركز وسال على لوجين فطلبت منه مسؤولة الاستقبال الانتظار قليلاً.
خرج فهد من المركز في اتجاه الشاطئ و اشعل سيجاره اخرى حتى سمع صوت خطوات تقترب منه فتلفت ووجد لوجين تقف امامه فمد يده يصافحها وبعد السلام قالت له لوجين: تعالى نقعد شوية
فهد: لا الشغل الاول عاوزك بقى تقوليلي اسعار المعدات يا هندسة
ضحكت لوجين: انا مشتغلتش مهندسة يوم واحد
فهد: بس انتي مازالتي مهندسة
لوجين: ماشي يا سيدي الاسعار عندنا في الورقة دي. انهت جملتها وهي تناوله الورقة
فهد: تمام انا عاوز المعدات دي لمدة ساعتين دلوقتي و لا بتقفلوا بدري؟
لوجين: لا المكان مفتوح بس الغطس ممنوع بعد الساعه 7
فهد: مفيش مشكلة. قوليلي بس مين المسئول وهتكلم معاه
لوجين: هتلاقي الظابط المسئول في المبنى ده. و اشارت له الى مبنى معين
فهد: بعد اذنك خلي الشنطة دي معاكي وجهزي الحاجة وانا هروح اتكلم معاه واجي ولو عاوزة تنزلي انتي كمان جهزي معداتك
ذهب فهد الى مكان الضابط المسئول وسال عنه فاشار له احد العساكر الى مكتب الضابط. طرق فهد مكتب الضابط ووقف في انتظار اجابة فسمع صوت الضابط يدعو من بالخارج للدخول.
دلف فهد الى المكتب وابتسم وهو يمد يده لمصافحة الضابط الذي تفاجا ثم صافحه في فتور واشار له بالجلوس. عرفه فهد بنفسه فبدا على الضابط الارتباك ثم الانتباه الى كلام فهد. بعد ان انتهى فهد من حديثه اعتدل الضابط في جلسته وقال: النقيب احمد العدل تحت امرك يا فندم خير.
ابتسم فهد قائلا: اهلا وسهلا يا احمد بيه. كنت عاوز بس استاذنك اني هنزل اعمل دايفينج لمدة ساعتين تبع مركز بلو ال (Blue L)
النقيب احمد: سيادتك عارف انه ممنوع بس لو ساعتين بس ممكن نحاول نمشيها مش اكتر من كده لان بعد كده في دوريات خفر السواحل
فهد: شكرا يا حمد بيه ومتقلقيش ساعتين بالكتير. انهى فهد جملته وهب واقفا وهو يمد يده لمصافحة النقيب احمد الذي هب واقفا بدوره
النقيب احمد: طيب يا فندم لازم تشرب حاجه حضرتك اول مرة تنورني
فهد: اعفيني المرة دي بس هجيلك تاني و تبقى ليا عزومة عشا مش قهوة بس
ضحك احمد قائلا: خلاص هستناك يا فندم
تصافح الرجلان وخرج فهد متجها الى مركز الغطس ليستعد وما ان وصل الى المركز حتى وجد لوجين مستعدة وهي تنظر له متسائلة: تمام؟
ابتسم فهد وهو يشير له بابهامه ان كل شئ جيد ثم قال: اديني 3 دقايق هستعد و نتحرك
لوجين: تمام اتفضل واشارت له الى اماكن تغير الملابس و الاستعداد
دخل فهد الى المكان المخصص للاستعداد وجاءت الفتاة المسئولة عن الاستقبال مسرعة وهي تسال لوجين: لوجي مين القمر ده؟
لوجين: ده فهد جارنا بس معرفش عنه كتير عشان بنتقابل صدف بس اللي اعرف انه ماما و جنا اختي بيحبوه و بيشكروا فيه ع طول و اتلمي يا علا.
علا: انا عملت حاجه؟ انا بسال بس وبعدين هو اقنع الظابط الرخم ده ازاي
لوجين: مسالتش بس انا عارفه انه كان ظابط سابق بس معرفش هو كان ظابط ايه
قبل ان تفتح علا فمها بسؤال اخر، خرج فهد فنظرت لوجين في ساعتها الرياضية بتلقائية وهي تقول في انبهار: دول 3 دقايق بالظبط. الطبيعي بيبقى عشر دقايق للمدربين
ابتسم فهد دون ان يعلق على هذه الجملة ثم قال: يلا بينا. تحرك الاثنان وبدأوا في رحلتهم.
خلال ساعه ونصف استمتعا بممارسة رياضة الغطس وكانت اول مرة للوجين ان تستمتع بتلك الرحلة في الليل. بعد انقضاء الوقت المحدد رجعا الى المركز وذهبا لتغير ملابسهما ثم تقابلا مرة اخرى في مكان الاستقبال.
فهد: شكراً جدا على المعدات والمدربة اللي نزلت معايا في الرحلة دي
لوجين: شكراً ليك انت خليتني انزل في الوقت ده بس انت قولت ايه للظابط عشان يوافق
فهد: طلبت منه وهو مشكورا وافق بس اشترط اننا نرجع في الوقت ده عشان خفر السواحل
لوجين في تعجب: بسهوله كده
فهد: اه الموضوع بسيط. اتفضلي يا هندسة. و ناولها ظرف
لوجين: ايه ده؟
فهد: ده تمن ايجار المعدات لمدة ساعتين
لوجين: انت بتهزر يا فهد انت ضيفي عيب كده
فهد: لا الشغل مفيهوش ضيوف و بعدين خلينا نتعامل الشغل شغل بدل ما اروح انفع المنافسين بتوعك
ضحكت لوجين: لا يا عم خلاص احنا بنربي زبون
تناولا كوبين من القهوة اثناء تجاذب اطراف الحديث ثم وقف فهد معلنا انه سيرحل فوقفت لوجين قائلة: ما تخليك شوية ده في حفلة ع الشط كمان شوية نحضرها سوا
فهد: لا خليها مرة تانية وانتي لو جيتي الناحية التانية كلميني وننزل نتقابل
لوجين: اتفقنا و هستناك تنورني قريب و نعمل طلعة تانية بس تبقى من اول اليوم
مد فهد يده ليصافحها قائلا: اتفقنا. مع السلامة
لوجين: سلام
مشى فهد الى سيارته ثم انطلقها وذهب الى منزله ليعد بعض الشطائر ويجلس امام التلفاز ثم يفتح الجهاز الخاص بالالعاب (PS5) و يندمج في اللعب حتى يغلبه النعاس و يؤي الى فراشه.
